San Cipriano, en Panes

El fin de semana que da pasu a la segunda quincena de septiembre marca el comienzu del otoñu folclóricu, al menos n'el Oriente; ´la fiesta de san Cipriano pué considerase como la última Grande de la comarca, con todos los alicientes para ello: mercáu, bolos, romería y verbenas, canción asturiana, etc...Esti añu participé por vez primera como gaiteru acompañante, con los intérpretes Liliana Castañón, Urbano Prieto y Jorge Tuya; al final resultó un fin de semana bastante activu, tras amenizar una boda, el sábado, en S. Vicente de La Barquera, y una merienda entre amigos, en Cabrales

Día d'Asturies 2012

Como llevo faciendo los últimos cuatro años, el ocho de setiembre encarrilé pola carretera'l Pontón hasta Ceneya, pa continuar serpenteando hasta el pueblu d'Amieva, (que a pesar de la coincidencia del nombre non ye la capital del conceyu). Pese a ya tar avanzá la mañana, taba tou muy tranquilu, habida cuenta que ya entamaron las celebraciones con una verbena la noche anterior. Con los primeros sones de la gaita y del tambor comenzaron a sonar los volaores, qu'en sitios como esti retumban especialmente fuerte. Tras el habitual pasacalles polas empinadas y bien hormigonadas calles del pueblu tuvo lugar la misa patronal, procesión incluida; después, mientras colocaban los panes p'a la posterior subasta del ramu, tuvi la oportunidad de acompañar a la cantadora local Laudelina Hortal, en "Carretera de Colloto". Finalizada la subasta del pan tocamos unas piezas, cercanos a la barraca, hasta que la xente se fue a comer.

    Esti añu coincidiónos la fiesta d'Amieva con la víspera de La Salud de Carreña, por lo que de tarde tuvimos que volver a vestir los hábitos tradicionales y tirar pa la capital de Cabrales a tocar la nocturna procesión del Panorama, que n'esta ocasión representaba un escanciaor de sidra. Como siempre, terminada la procesión, en la carretera general, acompañamos a las mozas nel "Asturias patria querida", previu a la quema del Panorama.